Viðvörun! Þetta er ekki háhraðanet

(Þetta hér fyrir neðan átti að vera athugasemd við frétt í Mbl. í febrúar. Mér blöskrar nefnilega þetta sífellda tal Símans og Alþingismanna um háhraðanet þegar það á alls ekki við. En þetta var áður en ég lærði á bloggið þannig að mér tókst ekki að tengja athugasemdina við fréttina)

________________________________

Allt er þetta auðvitað afstætt, líka bandbreidd eða hraði á Internettengingum.

En staðreyndin er að þetta sem samið hefur verið um við símann er í raun lágmarkskrafa miðað við  þarfir nútímans, eiginlega gærdagsins.

Hættan við að nota þetta orð "háhraðanet" er sú að stjórnmálamenn, bæði á Alþingi og í sveitarstjórnum haldi (séu jafnvel í góðri trú um) að þessi bandbreidd nægi fyrir alla framtíð og leggi því ekki áherslu á frekari umbætur. Þeir halda vafalaust margir líka að sú bandbreidd sem flestir þéttbýlisbúar hafa aðgang að sé meira en nægileg. Hitt er þó réttara að þegar búið verður að tengja alla þessa 1800 notendur, kannski í lok næsta árs verður krafan um raunverulegt háhraðanet orðin enn háværari en hún er nú. 

Misskiljið mig ekki: ég tel sannarlega að þessi samningur sé mikil bót fyrir þá sem enn hafa ekkert eða sama og ekkert. ADSL var líka og er mikil blessun sem millileikur þangað til unnt verður að koma á raunverulegu háhraðaneti, en það fæst ekki nema lagður verði ljósleiðari inn á hvert heimili.

Á fjarskiptaþingi sem Sturla Böðvarsson þáverandi samgönguráðherra hélt snemma árs 2001 lagði ég til í stuttu ávarpi að þjóðin ætti að setja stefnu á það markmið. Fyrsta skrefið væri að gera áætlun til að vinna eftir, síðan yrðu öll tækifæri notuð þar sem jörð væri rofin til að koma rörum fyrir ljósleiðara um bæi og sveitir. Þessi tækifæri eru æði mörg ef að er gáð. Þrátt fyrir framtak einstakra sveitarfélaga og t.d. Orkuveitu Reykjavíkur bólar ekkert á heildaráætlun enn í dag. 

Sem sagt: köllum hlutina réttum nöfnum. Ríkið hefur samið við Símann um að koma Internettengingu sem uppfyllir lágmarkskröfur til allra heimila á landinu, gott er það, en við skulum nota orði háhraðanet um það sem við fáum vonandi í framtíðinni, tí- eða hundraðfalda bandbreidd miðað við það sem í boði er núna.